Чăваш Енри тăватă районта ÿкнĕ кайăксен грипне тупса палăртнă. Икĕ районта карантин йĕркеленĕ. Этемшĕн çак чир хăрушлăх кăларса тăратма пултарать. Кайăк-кĕшĕк грипĕнчен мĕнле асăрханмаллине 2-мĕш Хула ача-пăча больницин инфекци пайĕн заведующийĕ Надежда Жукова каласа кăтартнă.

Çак муртан сыхланма темиçе правилăна пăхăнмалла:

— килти тата тискер кайăксен виллисене те, чĕррисене те тытма юрамасть;

— тискер кайăксем ишме пултарнă шыва кĕме юрамасть, çавăн пекех ĕçме те;

— çăмартана 10 минутран кая мар пĕçермелле;

— аша 100 градус температурăра 30 минутран кая мар хатĕрлемелле;

— кайăк-кĕшĕк какайне тата çăмартана лавккара кăна туянмалла.

Килти кайăк-кĕшĕк кăна мар, кăвакарчăн, çерçи, ула курак, чарлан, кăвакал, чана тата ытти кайăк та хăрушлăх кăларса тăратма пултараççĕ. Çак амак паллисем çынра темиçе сехетрен пуçласа 5 талăкчен палăраççĕ:

— шăнтать;

— пуç ыратать;

— ÿт температури 38 градусран пуçласа тата пысăкрах пулаять;

— пыр ыратать, нÿрĕ ÿслĕк аптăратать, юн та тухма пултарать.

"Хăвăр тĕллĕн сипленмелле мар, тухтăр патне васкамалла е киле чĕнмелле! Хăвăр сывлăха та, çывăх çынсенне те упрăр!" — асăрхаттарнă Надежда Жукова.